សមាគមសម្ព័ន្ធសារព័ត៌មានឯករាជ្យ ចេញសេចក្តីប្រកាសព័ត៌មាន ករណីលោក ឡាយ សុជាតិ ចាងហ្វាងសារព័ត៌មាន ទទួលចំណាត់ការផ្លូវច្បាប់ពីស្ថាប័នមានសមត្ថកិច្ច

 

បន្ទាយមានជ័យ​ :  ថ្ងៃព្រហស្បតិ៍ ១០រោច ខែបុស្ស ឆ្នាំរោងឆស័ក ពុទ្ធសករាជ ២៥៦៨ ត្រូវនឹងថ្ងៃទី២៣ ខែមករា ឆ្នាំ២០២៥ បន្ទាប់ពីកើតមានករណីចាងហ្វាងសារព័ត៌មាន ចំនួន ២រូប គឺលោក ដួង អក្ខរា និងលោក ឡាយ សុជាតិ ដែលត្រូវបានសមត្ថកិច្ច ឃាត់ខ្លួន បន្ទាប់ពីសមត្ថកិច្ច រកឃើញថា បានផ្សព្វផ្សាយព័ត៌មានមិនពិត នាំឱ្យប៉ះពាល់ដល់សន្តិសុខ សណ្តាប់ធ្នាប់សាធារណៈ និងកិត្តិយសរបស់រាជរដ្ឋាភិបាល ក៏ដូចជាប្រទេសជាតិទាំងមូល នៅថ្ងៃទី២២ ខែមករា ឆ្នាំ២០២៥នោះ សមាគមសម្ព័ន្ធសារព័ត៌មានឯករាជ្យ បានចេញសេចក្តីប្រកាសព័ត៌មាន ដែលមានខ្លឹមសារដូចខាងក្រោម ៖

សមាគមសម្ព័ន្ធសារព័ត៌មានឯករាជ្យ (IPA) មានកិត្តិយស សូមជម្រាបជូនសាធារណជន និងសមាជិកសមាជិកាសមាគមសម្ព័ន្ធសារព័ត៌មានឯករាជ្យទាំងអស់ មេត្តាជ្រាបថា នាពេលថ្មីៗនេះ លោក ឡាយ សុជាតិ ចាងហ្វាងសារព័ត៌មាន ខេមបូឌាស្តាដេលីញូវស៍ 24/24hជាសមាជិកសមាគមសម្ព័ន្ធសារព័ត៌មានឯករាជ្យបានទទួលចំណាត់ការផ្លូវច្បាប់ពីស្ថាប័នមានសមត្ថកិច្ច បន្ទាប់ពីផ្សព្វផ្សាយព័ត៌មាន ដែលត្រូវបានសមត្ថកិច្ច រកឃើញថា ជាការផ្សព្វផ្សាយមិនពិត នាំឱ្យប៉ះពាល់ដល់សន្តិសុខ សណ្ដាប់ធ្នាប់សាធារណៈ និងកិត្តិយសរបស់រាជរដ្ឋាភិបាល ក៏ដូចជាប្រទេសជាតិទាំងមូល។ ក្នុងនោះ សមាគមសម្ព័ន្ធសារព័ត៌មានឯករាជ្យ ក៏បាននឹងកំពុងតាមដានយ៉ាងយកចិត្តទុកដាក់បំផុតចំពោះករណីនេះផងដែរ។

ក្នុងជំហានបឋមនេះ សមាគមសម្ព័ន្ធសារព័ត៌មានឯករាជ្យ សូមប្រកាសគាំទ្រចំពោះចំណាត់ការផ្លូវច្បាប់របស់អាជ្ញាធរមានសមត្ថកិច្ច លើករណីនេះ រួមទាំងករណីកន្លងមក ដើម្បីទប់ស្កាត់ការផ្សព្វផ្សាយព័ត៌មានក្លែងក្លាយ ព័ត៌មានដែលនាំឱ្យប៉ះពាល់ដល់ផលប្រយោជន៍សាធារណៈ។

យ៉ាងណាក៏ដោយ សមាគមសម្ព័ន្ធសារព័ត៌មានឯករាជ្យ ពិតជាសោកស្ដាយចំពោះរឿងហេតុ ដែលបានកើតឡើងលើសមាជិកសមាគមសម្ព័ន្ធសារព័ត៌មានឯករាជ្យ និងមានជំនឿជឿជាក់ថា តាមរយៈការស្រាវជ្រាវ ក៏ដូចជាបទពិសោធដែលបានអនុវត្តកន្លងមក សង្ឃឹមថា ស្ថាប័នមានសមត្ថកិច្ច នឹងពិនិត្យលើករណីនេះ ដើម្បីរកនូវលក្ខខណ្ឌបន្ធូរបន្ថយទោស ក្នុងកម្រិតណាមួយ ដោយយោងលើការទទួលស្គាល់ទោសកំហុសរបស់អ្នកដែលបានប្រព្រឹត្តក្នុងន័យរបស់បុគ្គលជាសមាជិក។

ភ្ជាប់នឹងករណីនេះ សមាគមសម្ព័ន្ធសារព័ត៌មានឯករាជ្យ សូមអំពាវនាវដល់បណ្តាអង្គភាពសារព័ត៌មាននិងអ្នកសារព័ត៌មាន ជាសមាជិក ក៏ដូចជាបងប្អូនអ្នកសារព័ត៌មាន រួមទាំងសាធារណជន ចូលរួមប្រយុទ្ធប្រឆាំងព័ត៌មានក្លែងក្លាយ ដើម្បីលើកកម្ពស់គុណភាព នៃការផ្សព្វផ្សាយនៅកម្ពុជា។ យ៉ាងណាក៏ដោយ សមាគមសម្ព័ន្ធសារព័ត៌មានឯករាជ្យ នៅតែលើកទឹកចិត្តចំពោះអ្នកសារព័ត៌មាន ទាំងសមាជិកក្ដី និងអ្នកសារព័ត៌មានទូទៅក្ដី ក៏ដូចជាប្រជាពលរដ្ឋ ចូលរួមរាយការណ៍ព័ត៌មាន និងផ្សព្វផ្សាយព័ត៌មាន ដើម្បីរួមចំណែកដោះស្រាយបញ្ហាផ្សេងៗដែលបានកើតមានឡើងនៅក្នុងសង្គម ក្នុងន័យប្រកបដោយវិជ្ជមាន៕