អង្គភាពសារព័ត៌មាន BMC post យើងខ្ញុំសូមចូលរួមរំលែកទុក្ខ និងសោកស្តាយអាណិតស្រណោះជាទីបំផុត ចំពោះកូនប្រុសលោក ទៀវ សំអុល ចាងហ្វាងការផ្សាយលើគេហទំព័រ ថ្ងៃថ្មី ដែលបានមរណភាពនៅវ័យក្មេងយ៉ាងនេះសោះ...

 

បន្ទាយមានជ័យ :  បើទោះបីអង្គភាពពន្ធនាគារខេត្តបន្ទាយមានជ័យ ចេញសេចក្តីបំភ្លឺ យ៉ាងដូចនេះក្តី ក៏មហាជននៅតែអស់សង្ឃឹមជាខ្លាំងចំពោះការខ្វះចន្លោះផ្តល់ការថែទាំសុខភាពថ្នាំសង្កូវ ស្តារនីតិសម្បទាដល់អ្នកទោស ។

ទើបមានមតិរិះគន់លើកឡើងដើម្បីស្ថាបនាកែលម្អយ៉ាងដូច្នេះថា :  នេះជាជីវិតរបស់មនុស្សម្នាក់ ទោះបីគាត់ជាពិរុទ្ធជន(អ្នកទោស)នៅពន្ធនាគារ ក៏គាត់មានសិទ្ធិរស់រាន្តមានជីវិតដែរ ជាពិសេសអ្នកទោសមានសិទ្ធិទទួលបានការព្យាបាលនិងការថែរទាំសុខភាពឱ្យសមស្របដែរ។ ចំណែកឪពុកម្តាយនិងក្រុមគ្រួសាររបស់គាត់ក៏សង្ឃឹមថាពន្ធនាគារនឹងស្តារនីតិសម្បទានិងកែរប្រែកូនរបស់គាត់ឡើងវិញ ហើយពួកគាត់មិនរំពឹងថាកូនរបស់គាត់មកឈឺស្លាប់នៅពន្ធនាគារអុីចឹងទេ។

 នេះបាត់បង់អាយុជីវិតមនុស្សផង អស់លោកនៅតែចេញសេចក្តីប្រកាសព័ត៌មានលើកឡើងពីកិត្តិយសរបស់អស់លោកទៀត ដោយក្នុងសេចក្តីប្រកាសព័ត៌មាននេះ អស់លោកមិនបានបង្ហាញនូវការសោកស្តាយចំពោះការបាត់បង់នូវអាយុជីវិតរបស់មនុស្សទេ ជាពិសេស អស់លោកមិនបានបង្ហាញនូវសមានចិត្តចូលរួមរំលែកទុក្ខដល់ក្រុមគ្រួសារនៃសពទេ លើសពីនេះទៀត អស់លោកមិនបានសុំទោសក្រុមគ្រួសារសពដែលកូនរបស់ពួកគាត់មកស្លាប់នៅពន្ធនាគាររបស់អស់លោកទេ តែអស់លោកចង់បានកិត្តិយស?

ខ្ញុំយល់ថា ដើម្បីយុត្តិធម៌ ក្រសួងមហាផ្ទៃ ក្រសួងយុត្តិធម៌ និងគណកម្មការសិទ្ធិមនុស្សកម្ពុជាត្រូវស៊ើបអង្កេតឱ្យច្បាស់ថា ពេលគាត់ឈឺភ្លាមៗ តើមន្ត្រីនៃពន្ធនាគារ ពិតជាមិនធ្វេសប្រហែស យកចិត្តទុកដាក់ថែរទាំគាត់ភ្លាមៗទេ? បើជាការធ្វេសប្រហែស មិនយកចិត្តទុកដាក់នោះ ករណីនេះត្រូវតែមានអ្នកទទួលខុសត្រូវ ដើម្បីយុត្តិធម៌ដល់អាយុជីវិតរបស់មនុស្សដែលបានស្លាប់ទៅ និងក្រុមគ្រួសាររបស់គាត់។

ខ្ញុំយល់ថា ការបកស្រាយរបស់ពន្ធនាគារនៅមានចន្លោះប្រហោងមួយចំនួនទាក់ទងនឹងថាតើគាត់ចាប់ផ្តើមឈឺតាំងពីពេលណា? បញ្ជូនមកដល់មន្ទីរពេទ្យពេលណា? ហើយគាត់ស្លាប់នៅពេលណា? បើបញ្ជូនបានមួយថ្ងៃស្លាប់ អាហ្នឹងត្រូវស៊ើបបន្ថែមហើយ ទាក់ទងនឹងប្រវត្តិនៃជំងឺរបស់គាត់តាំងពីមុនគាត់ចូលពន្ធនាគារហើយនិងក្នុងពេលដែលគាត់បានជាប់នៅក្នុងពន្ធនាគាររយៈពេលជាង១ឆ្នាំ មុនបញ្ជូនគាត់ទៅមន្ទីរពេទ្យ។ បើថាគាត់ស្លាប់ដោយសារជំងឺបេះដូង មានន័យថាគាត់មានប្រវត្តិមានជំងឺបេះដូងហើយ ប៉ុន្តែពន្ធនាគារបានបកស្រាយថា ក្នុងពេលនៃការជាប់ពន្ធនាគាររយៈពេលជាង១ឆ្នាំ គាត់មិនធ្លាប់មានជំងឺអីទេ។ នេះជាការបកស្រាយដែលមានចន្លោះប្រហោង។

ខ្ញុំយល់ទៀតថា រឿងអ្នកទោសដែលស្លាប់នៅពន្ធនាគារ ឬទោះបញ្ជូនមកមន្ទីរពេទ្យហើយស្លាប់ បើមានភាពមិនប្រក្រតី ត្រូវមានអង្គភាពស៊ើបអង្កេតឯករាជ្យមួយធ្វើការស៊ើបអង្កេត ទើបការបកស្រាយមានសុពលភាព តម្លាភាព និងភាពអាចជឿរជាក់បាន ជាពិសេសមានយុត្តិធម៌៕